Carl-Josef Kutzbach
 
Dui guade Nochricht vo Weihnachte nach Lukas 2 Dr Kaiser Auguschtus hot meh Steire han welle ond drom bfohla, dass sich älle melda müsstet. Des isch bassiert, wie dr Quirinus en Syria Statthalter gwä isch. Ond weil mr sich hot müsse en seiner Hoimatstadt ufschreiba lasse, isch dr Josef von Nazareth in Galiläa nuff nach Bethlehem en Judäa, dr Stadt vom David, von dem au dr Josef stammt, eba om sich dort ufschreiba zom lasse. Er hot sei Verlobte drbei ghet, dui isch schwanger gwä. Wie se na kommet, hot se des Kendle kriagt, en Wendle gwicklet ond in a Krippe nei glegt, weil s'isch en dr Herberg koin Platz meh gwä. En dr Näh sen in derra Nacht Hirta uffm Feld bei ihre Tierle gwä. No isch an Engel komma mit ganz viel Licht ond se sen arg verschrocka. Aber der hot gsait: „Hend koi Angscht! I breng eich ond älle arg viel Freid. Heit isch en der Stadt vom David der Heiland gbora worda, der Chrischtus der Herr." I nenn eich a Zeicha: „Ihr fendet a Kendle enera Krippe en Wendla!“ Ond pletzlich sin no meh Engel do gwä on hend gsait: "Ehr' sei Gott da droba, ond Fried uff dr Erde fir älle Menscha, di wo's guat moinet." Wi dui Engel en dr Hemmel nuff send, han d'Hirta gsait: "Nuff nach Betlehem ond gucka, was bassiert isch, so wi des der Kerle gsait hot!" Na hend se nore gmacht ond fendet tatsächlich Maria, Josef, ond des Kendle in derra Krippe. Wi se des gsäh han, hend s's iberall rom verzählt ond au, was dr Engel gsait hot. No sen no meh komma and hend sich gwondert, au iber des, wo die Hirta verzählt han. Maria hot es net glei verstanda, aber au et vergessa ond immer wieder driber nochdacht. Di Hirta aber sen hoim zu ihre Tierle and hend da Liaba Gott globt ond em fir älles dankt, was se grad erlebt ghet hen. Nodiert am: 2.12.2018