Carl-Josef Kutzbach
 
S's Weihnachts-Evangelium mit em Kommentar nach Lukas 2 Dr Kaiser Auguschtus hot meh Steire han welle ond drom bfohla, dass sich älle melda müsstet. Ha der hot d' Hals au et voll gnung kriaga kenne ond drom dui kloina Leit schikaniert. Des isch gwä, wie dr Quirinus en Syria Statthalter gwä isch. Na wois mr wenigschten an wen mr Beschwerda schicka hät solla. Ond weil mr sich hot müsse en seiner Hoimatstadt ufschreiba lasse, isch dr Josef von Nazareth in Galiläa nuff nach Bethlehem en Judäa, dr Stadt vom David, von dem au dr Josef stammt, eba om sich dort ufschreiba zom lasse. Ha des muss ja a Gwusel gwä sei, wenn jeder hot hoim welle. Ond wer zahlt des? Dr. Auguschtus? Ha glaub doch des Deng et! Er hot sei Verlobte drbei ghet, dui isch schwanger gwä. Wenn des koi Wonder gwä wär, na hät mr saga könne, sell ka passiera. Wie se na kommet, hot se des Kendle kriagt, en Wendle gwicklet ond in a Krippe nei glegt, weil s'isch en dr Herberg koin Platz meh gwä. Womeglich isch des älles als Konjungturprogramm fir die Wirtshäuser gmoint gwä. S war vermutlich dui erschte große Reisewelle domals. En dr Näh sen in derra Nacht Hirta uffm Feld bei ihre Tierle gwä. No isch an Engel komma mit ganz viel Licht ond se sen arg verschrocka. Koi wonder! Flutlicht ond LEDs hots ja no nett gä! Aber der hot gsait: „Hend koi Angscht! I breng eich ond älle arg viel Freid. Heit isch en der Stadt vom David der Heiland gbora worda, der Chrischtus der Herr.” Mr hot scheints scho uff 'n gwartet ond en kennt?Aber mr war wohl a bissle skeptisch: I nenn eich a Zeicha: „Ihr fendet a Kendle enera Krippe en Wendla!“ Des isch etz net grad arg orginell, aber et elle Mütter werdet ihres en a Krippe nei do han. Ond pletzlich sin no meh Engel do gwä on hend gsait: Ha dui hätted doch wenigschtens senga kenne, oder? "Ehre sei Gott da droba, ond Fried uff dr Erde ond fir älle Menscha, di wo's guat moinet." Dass dui, wo's guat moinet, au amol ebbes kriaga, des gfallt mir! Wi dui Engel en dr Hemmel nuff send, Wo hättet se denn sonscht au na ganga oder fliaga solle? han d'Hirta gsait: "Nuff nach Betlehem ond gucka, was passiert isch, so wi des der Kerle gsait hot!" A bissle wondrfitzig sen se scho gwä. Ond wer hot derweilsch nach de Tierle guckt? Na hend se nore gmacht / pressiert ond fendet tatsächlich Maria, Josef, ond des Kendle in derra Krippe. Em Normalfall wär des "nächtliche Ruhestörung", aber s'isch ja a Wonder gwä. Wi se des gsäh han, hend s's iberall rom verzählt ond au, was dr Engel gsait hot. Ha freili, so a Gschicht hosch et älle Täg om verzähla! No sen no meh komma and hend sich gwondert, au iber des, wo die Hirta verzählt han. Des ka mr verstanda, vor ellem, wenn se scho so lang unf gwartet hen. Maria hot es net glei verstanda, aber au et vergessa ond immer wieder driber nochdacht. Ha nach dera Geburt au no Denksport, des isch au a bissele viel! Di Hirta aber sen hoim zu ihre Tierle and hend da Liaba Gott globt ond em fir älles dankt, was se grad erlebt ghet hen. Alle Achtong! Dui sen vernünftig, weil se ja am nächschte Tag wieder raus misset, aber dui sen au aständige Leit, die sich bedanka. Nodiert am: 2.12.2018