Der Scheiß-Müll!

 

Schwoba waret längschte Zeit arme Leit. Also hot mr uf sei Sach achtgeba ond älles so lang braucht, wie's ebba ganga isch, wie's do hot. En dr Landwirtschaft hot mr oinawäg älles wieder verwertet. Was vom Acker komma isch, ging durch dui Mäga ond na über d'Mischte wieder uff's Feld. Ond was mr net wieder nausführa konnt, etwa des Strohdach, oder dr Strohhut, des hot mr na so lang gstopft bis es gar nemme ging. Also a Schwab isch sparig ond lasst nix verkomma. Des hot sogar mal en Herzog gwisst ond droht: Wer sei Sach et pflegt ond verkomme lässt, dem ka's fortgnomma werda. Drom hängt mr's Bettzeug zur Straß naus zom Lüfta ond macht sei Kehrwoch, so, dass es au jeder merkt.

So ond wenn i jetz in moine Mülloimer glotz, na packt me d' kalte Wut. Lauter Tütle, Karto ond Pabier, was bloss oi kotzichs Mol gnutzt worda isch. Ja Heidabimbam, des isch doch saudomm! Selbscht wenne dui Folie vom Papierle ra zieh ond in an extra Mülloimer schmeiss, wird doch der Müll et weniger. Ond warom breng i vo jedem Eikaufa an Haufe Glomb mit, was e gar et bräucht? I be an alter Ma ond ess nemme so viel, wie frühner, au han i weniger Bsuch, dem mr ebbes bieta müsst. Also ka ich bloß kloine Portiona kaufa. Aber selle paar Wurschträdle kommet en a Papier mit Folie dra, ond des na wieder in a Guck, ond damit i da nix nei schmuggle ka, ond Kass woiß, wasse berechne sott, wird dui Guck au no mit em Zettel zubäbbt, auf dem steht, was in der Guck drin isch, was des wiegt ond wasses koscht. Au bei Obscht, Salat ond Gmüs bekommt mr sottiche Bäbber ond Gucke, en di mrs nei do sott. Etz machet se sogar Bäbber uf d'Gurka oder Äpfel, dadrmit mr auch ja woiß, vo wo die kommet. Dass I nix essa möcht, was von Henderpfüideufel kommt ond an dem no des Kerosin oder dr Diesel klebt, isch schon klar. Aber wemmer dui Herkunft an des Kischtle schreiba tät, wo des Futter dren isch, tät mir des langa. Oder musse draus schließe, dass des älle Lugabeitel sen, die drufschreibe, was se wellet, om dui Konda zom Bescheißa? Ha na kommet no hoim!

Onder meinere Spüle han i an Oimer fürs Papier, an Sack für dui Verpackonga, oin Oimer für Greanes ond Essensreschte, a Körble fürs Altglas ond no oin Oimer für da Rescht. Ond älle derf i na rausstelle, oder en andre Kübel omfülle, oder fortbringa ond der Platz en dr Küch isch oinaweg verlora. Ond i ben no guad dra, denn i kauf bloß Flascha, wo ne wieder abgeba ka, ond I han älleweil Stoffbeitel drbei, sodass i weder a Plaschtik-, no a Papier-guck brauch. Ond trotzdem macht mir de leidig Müll meh zom Schaffa, wierea Wert sich. Unneddichs Gschäft, des kanne grad braucha!

Als Kend hanne d'Milch no em Blechkännle gholt, ond Käs ond Wurscht sen en Butterbrotpapier eigwickelt worra. Das hots doch au do. Kartoffle, Obscht, Gmüs, des hot mr so in a Netz oder de Korb do, ond für d'Salat zom Eiwickle hot mr alte Zeitonge genomme. Ond wenn di wieder trocka gwä sen, no hat mr mit denne au no nasse Schuh ausgestopft, bis dui wieder trocka waret. Dui Gsälzgläsle hot mr s nächscht Jahr zom Eimache gnomma ond Gwürzgurka hot mr oinzeln vom Metzger aussem Fass kriagt ond in Butterbrotpapier hoim trage. Obwohl mr damals no mit Kohle ghoizt hot, isch mr en dr Familie mit oim Blechmülloimer auskomma. Warom goht des nemme? Wozu der ganze Müll? Pille sen nemme im Gläsle, sondern em "Blischter". Ja leichter isch es, aber meh Müll macht's au! Älles was kloi isch, wird in sottiche Blischter verpackt, oder große Kartons, dadrmit mrs em Lade et mitlaufe lasse ka. Des kommt halt vorn derra Selbstbedienong. Erscht spart mr Personal ond na bruacht mr Blischter ond an Detektiv, ond Fotoapparätle, ond Kontrolla, weil sonscht so viel verschwendet. Tätet ihr dui Leut atändich ond freundlich bediene, na wär des koi Problem! Ond mr hät weniger zom Trage ond weniger Müll.  

Ach des sei älles wega derra Hygiene, sagt Ihr? Saperlot, na müsstet Leut ja früher ständig krank gwä sei ond heut wäret Doktor arm, weil älle so gsond sen? Na bräucht mr ja gar koi Krankakasse meh, vor lauter Hygiene? Des könnet ihr Eurer Oma verzähle, aber et mir! I han de starke Verdacht, dass ihr mi für domm verkaufe wellet, ond alleweil des behauptet, was eich en dr Kram passt, egal obs stemmt, oder et. Irgend wie passt des ganz guat zom Müll, dass ihr au Müll rausschwätzet. Aber I sag's eich: Ihr könnet mir d Buckel ra rutsche mit eurem Scheiß-Müll!